- Mure shavorenge -
O Del amencaj, haj zhutij. Chi bisterdyol pa amende, kade sas vi dulmut, kadej vi akanak, haj kade avla punej lumaj e luma.
Das ame lasha da, lashe dades, phralen, haj shavoren. Najisaras leske, lesko lashipe. Zumavas, lashe te avas, te kamas jekhavres, haj te zhutisaras pe jekhavreste.
Phenav tumenge anda muro chacho jilo jekh patyivalyi vorba. Dulmut nas kade, dulmut e rom kamenas jekhavres, zhanas jekhavreste angalyi denas jekhavres, haj losshanas jekhavreske, shukar sas…
Fajasma kadal shukar dulmutane luludyasle butya palpale te shaj anasas. Vi o Del losshalas ando cheri. Pharoj mange muro jilo haj muro dyi. Bolden tume palpale karing jekhavreste. Mangav tume, haj rudyi tumenge te patyan muri vorba.
Vi o Del losshala. Kaver phenav tumenge. Varikana - shikana kethane trajinas andej romane vatri e rom. Muri dej, muri somnakuni dej ando Dobozi rakhadyilas, intya karing e krisha. Kothe mashkar e but-but rom shukar sas o trajo, o romano.
Akanak sar e gazhe trajisaras. Akanak aba feri kodi trubujas te zhanav, te rovav, dore te assav.
Kodi kamen te zhanen so dukhal man? Avri merel e romani shib,e romani vorba, o romanimo. So avla atunchi, pala kodi. Feri o Deloro zhanel. Chi avna rom, avri meren. Pe kadi chi gindin e rom.
Kaske avla kadi mishto? Chi avla rom pej Phuv, chi avla gindo.
Chi kamav avri te phenav, kon losshana, kon kathe beshen amenca, kon kathe trajin. Hatyaren ?
So dukhal ma? Chi vorbin romanes amare shavora. So avna lenca, gazhe avna.
Mishto ashunen so akanak phenav tumenge: chi gazhe chi avna, de chi rom. Feri jekh phenav tumenge, but shaj phenos. Kathar soste avna rom te na vorbina e shib.
„Ande pengi shib trajin e naciovura.” Patyan muri vorba, sityaren pej romani cigna, pej romano kris, haj pej romnai shib tumare shavoren.
